لقد اتت الساعة
مش عارف ابدأ منين ومن زمان بنعمة ربنا بكتب وسطيكوا بس المرة دي حاسس ان جسمي بيرتعش وعيني بتدمع ومش عارف اكتب ايه؟ من ساعة اللي حصل؟

اللي حصل ببساطة ان بابا اخد الاسرة وولاد اختي الصغيريين (عمرهم حوالي سنتين ونص) وراح المنيا الجديدة, وساكن معانا في المكان هناك أب كاهن, واول ما وصل بابا بالعربية كان نازل الاب الكاهن من بيته ومشى قدام ولاد اختي اللي لسه منزلوش من العربية وعلى الفور ولاد اختي زعقوا بسرعة باااااااااااااااااااابااااااااا يسوووووووع

سمعهم الاب الكاهن فتأثر جداااااا وقال هما شايفني بابا يسووووع
القصة دي مش اثرت فىّ وبس لكن هزت كياني كله وغربلت افكاري جمعاء لاني سرحت فترة وقلت كام انسان زي اطفال اختي بسيط في الايمان ومش هيقدر يشوف الله غير في رجال الدين او في الخدام او في المؤمنين؟؟, وطلعت بكام فكرة بسيطة نفسي اعيش كل حاجة فيها..

1- إننا بنغلط غلطة كبيرة اووي لما بنحصر قدرة الله في معجزات بسيطة زي شفاء المرضى او اخراج شياطين او نقل جبال حتى, لكن اعظم معجزة ف راي الشخصي المتواضع هي سكنى الله داخل الانسان,, استمتع كدة معايا بالاية دي: انا فيهم وانت في ليكونوا مكملين الى واحد، وليعلم العالم انك ارسلتني، واحببتهم كما احببتني. يوحنا17.

2- تأملت كدة في العمر بتاعي اللي عدى وكام واحد شاف فىّ ربنا على مر حياتي, لاقيت نفسي بصرخ باعلى صوتي من اعمااااااااااااقي اه ياااااااااااااااااااااارب, ارحمني.

3- سألت نفسي ازاي الناس تشوف الله في اللي شخص ما؟؟؟
اكتشفت حاجات كتير اوي ان الله بيحب الانسان اووي عشان كدة نزل عشانه, مش عشان يفديه من خطيته وبس لكن عشان يرجع للانسان انسانيته, يحس بالمه يعني مثلا,

• الكتاب قال المسيح كان يجول يصنع خيرا, ياترى انا كام عمل محبة عملته لاجل البشر.
• ارملة يحس بيها ويشفق عليها ياترى انا كام ارملة حسيت بيها اه يارب.
• واحدة امسكت في ذات الفعل مش يستذنبها عشان يزايد عليها روحياً, لكن يجري يشجعها ويقف جنبها ويدافع عنها ويرجعها لحضن الله الحي الحقيقي, مش بيدين لكن بيرجع الناس تاني لحضن الله, ياترى انا كام خاطي دافعت عنه وصليت لاجله ووقفت معاه وخد بايده من ضعفه؟؟ اه يااااااااارب ارحمني.

• تعامله مع رجال الدين القاسي اللي افكارهم ساعات بتكون ساتر بين الناس وبين الله مش بيجاملهم عشان الامور تمشي والسلام الزائف يكون موجود لكن بيوضح الحق بكل قوة وجهراً, كام مرة ممشتش مع التيار عشان بتحب ربنا فعلا وغيران علي الحق.

• مكتوب عنه الذي لم يفعل خطية ولا وجد في فمه مكر الذي اذ شُتم لم يكن يشتم عوضاً واذ تألم لم يكن يهدد بل يُسلم لمن يقضي بعدل, كم مرة انا رديت الاساءة باساءة والاهانة باهانة اه ياااااااااارب ارحمني وسامحني.

• كم مرة طلبت من الله اني اشوف ايات وعجائب وربنا كان بيشجعني ويوريني عن طريق فتاه القدوس يسوع, ولتجر ايات وعجائب باسم فتاك القدوس يسوع اعمال30:4 وبالرغم من كدة مكنتش عايش حياة القداسة فترات طويلة,, بالرغم ان الله قال كونوا قديسيين كما ان اباكم هو قدوسلا 20: 7, اه يارب سامحني وقدسني بالتمام.

• الابن لما كان على الارض فرح قلب الاب بصنع مشيئته وبتمميم ارادته, كم من مرة اختارت انا مشيئتي منجرفا وراء اختياراتي ورغباتي,وغلبت الجسد علي الروح,, اه يارب سامحني

• الخدمة والجهاد القانوني: تأمل يوم السيد المسيح لما كان علي الارض وتخططيطه لعمله ولنشاطه في انه يجيب نفوس من كورة بعيدة, لكن انا مكنش تخطيط وكسلت وخسرت حرب الروح مع الجسد.

• الابن قبل ما يبدأ خدمه صام وصلى اربعين يوم قبل خدمته للامتلاء بالروح القدس وانا بحزن الروح القدس و مش بصلي لاجل النفوس الا القليل قبل ما بخدمها لكن بصلي جامد اووي لما يكون في مشروع او ويب سايت بيخلص او شغل بظبطه!! اه يارب ارحم ضعفي وجهلي وغبائي حررني وفوقني يارب شيل مني وضع انت في داخلي.

• الله محبته كانت عملية (اخلى ذاته اخذا صورة عبد) لكن انا لسة ذاتي عالية وبتقف حائل كبير بيني وبين تفريغ محبة الله الحي الحقيقي للناس.

معنديش كلام اقوووووووووله الان فعلا غير اني فعلاً يارب شوهت صورتك مش كنت صورتك, معنديش كلام اقوله غير اللي قاله الابن الضال اجعلني كا احد اجرائك انا مستحقش اكووووون ابن ليك انا مستحقش اكوووون ابن ليك انا مستحقش يُطلق علىّ مسيحي اصلاً, معنديش اي رجاء يارب نهائيا غير في رحمتك ونعمتك اللي اقوى من كل اللي عملته لان حبك الى المنتهى الي ما لا نهاية اللي هينتشلني من اللي انا فيه ويعمل المعجزة فىّ يارب انا ضعيف خلي كل اتجاه قلبي في ناحيتك يارب, انا عندي ايمان في ايدك الفخارية يارب بس معنديش ايمان في قدرتي علي عمل اي حاجة اعن ضعفي, يارب نادي علي المياة اللي نشفت جوايا يارب

اخيرا: وليس اخرا نفسي اقول حاجة لنفسي اولا ولكل الخدام والقساوسة والمسيحيين اجمع, الزمان اتغيير كثيرا عن مما مضى, كفاية اهتمام زائد بالانشطة والوعظات, الناس متألمة جداااا تعبانة اكتر محتاجة تشجيع محتاجة خدام وقساوسة مش يقفوا علي منابر بس لكن محتاجهم اكتر انهم يزوروا متالمين يداواو مجروحين يرشدوا محتارين, يساعدوا مسجووونين علي العتق,اشجعك تقرا الايات دي بدقة اكتر اللي في مت25 (اذهبوا عني يا ملاعين الى النار الابدية المعدة لابليس وملائكته),,خلينا نعمل بس اول وصية وهي احب قريبك كنفسك مت 19 والنهاردة بس انا فهمت الاية اللي بتقول ((كثيرون سيقولون لي في ذلك اليوم: يا رب يا رب اليس باسمك تنبانا وباسمك اخرجنا شياطين وباسمك صنعنا قوات كثيرة))فين محبتنا الحقيقية للي حوالينا,

متهأيلي كفاية اوووووووووووي كدة لقد اتت الساعة محتاجين يسوع يتمجد فينا كفاية مجد ذواتنا.
كفاية كلام من نفسنا وتصرفات من دماغنا, كفاية مشيئتنا اللي تسووود عاوزين نحب الكل ونكلم الكل ونوصل للكل ونقبل الكل للخاطي للبعيد للمستهتر للمهمل للمؤمن لان الله بيحب الكل ونتذكر دائما “من يتكلم من نفسه يطلب مجد نفسه، واما من يطلب مجد الذي ارسله فهو صادق وليس فيه ظلم”. (يوحنا7)

ماريو عادل

إذا افادك المقال بشجعك فى الاشتراك فى كور كيف انمو فى حياتى مع المسيحhttps://talmazaonline.com/courses/growth/