ازاي ممكن نوصل في علاقتنا مع ربنا لعمق جديد ؟!

انا متولدتش في كنيسة و مشربتش الكتاب و حفظته من صغري ولا حضرت قداسات و صلاوات و عمري ما اتناولت و لاحتي رجلي عتبت كنيسة ولا عندي كتاب مقدس في البيت ، و بالرغم من كل ده ربنا عرف يوصلي ، و يعرفني عن نفسه و يخليني افهمه اكتر و افهم عايز يقولي و يعلمني ايه ، انا سبت نفسي ليه و هو اللي اشتغل ، و كل سؤال جيه في بالي ربنا كان بيبعت اجابته علشان يريحني ، و هو اللي لحد اللحظة دي بيختارلي اقرا او افكر او اتأمل في ايه!!

بس ثواني الموضوع مش وردي كده ، احنا بنشتغل جامد علشان نترقي و مكانتنا تزيد … و ده بالظبط اللي حصل ، انا اتجربت كتير جداً جداً و لحد دلوقتي بدخل في تجارب ، و في البداية مكونتش فاهمه عمق معني التجربة و اذا كان اصلا اللي انا فيه ده تجربة ولا لأ .. و يامااا زعلت و اضايقت ان ليه بيحصلي كل ده و انا بحاول افهمك ليه بتعمل معايا كده!! و بعد كل السنين دي انا فهمت اني كان لازم امر بكل الوجع و الآلام اللي مريت بيها بس علشان امسك فيه اكتر و علشان اعيش حياة التسليم اللي عيشاها معاه حالياً.انا متخلتش عن ربنا و ماستسلمتش و حاربت علشانه و حافظت علي علاقتي معاه تحت كل الظروف اللي حصلت و ميأستش لما كنت بحس انه خلاص سابني ..

في كل مرة كنت بنزل لتحت كانت ايد ربنا بتزقني تاني علشان اكمل و مفهمتش ده برضه غير دلوقتي .. العند اللي كان جوايا علشان اوصل لنهاية الطريق و اتعرف عليه و افهمه اكتر هو اللي كان السبب فيه .. هو اللي عايزني .. هو اللي بيحبني .. انا الحمل الضال اللي متسبتش اتوه وسط العالم .. انا بنته قبل كل حاجة فمكانش ينفع يسبني اتوه و ابعد عنه.

انا مكونتش محتاجة قداسات او كنيسة علشان افهمه فيها .. ربنا خلي قلبي كنيسة و دايماً قاعدين مع بعض فيها .. زمان كان بيبقي نفسي ادخل كنيسة علشان كنت بحس ان ممكن يكون ده السبب اللي مخليني انا و ربنا مش قادرين نفهم بعض كويس ، بس هو علمني اني انا كنيسة و مش محتاجة اروح علشان احس بيه ، و بصراحة لما موضوع قفل الكنائس حصل فكرت في ان كل الناس دلوقتي هتبقي زي و قلت اكيد هيحسوا باللي بحسه و بستغرب انهم زعلانين قوي ، طيب ما هو ربنا موجود في كل مكان و اقربهم قلبكم ، اهدوا و سكتوا شلال الافكار اللي جواكم و طلباتكم اللي مبتخلصش و اطفوا النور علشان ربنا هينور قلبكم و فكركم و انتم معاه ،

صدقوني انا لحد دلوقتي مش عارفه انتم بتصلوا ازاي و حاولت كتير اصلي زي ما فهمت من الاجبية و الكتاب و كل اللي بيحصل ده بس بصراحة بقيت بحس اني بقول كلام و خلاص و وقتها قررت ادور علي معني الصلاة الحقيقة اللي ربنا عايزها مننا .. و صلاتي بقت

عبارة عن اني بقفل علي نفسي و اطفي النور و اسمع ترنيمة و اصلي الصلاة الربانية و بعد كدة بقعد مع حبيبي اللي بستني اليوم كله يخلص علشان اشكره من قلبي علي كل تفصيلة حرفياً سواء حلوة او وحشة حصلت معايا و لو غلطت بعتذر و اوعده اني اتحكم اكتر في نفسي و بعترفله بجد بكل حاجة و بهزر معاه كتير و بضحك و صدقوني انا بحس بوجوده معايا و حضوره القوي اللي بيسيطر عليا ، و صلوا و انتم واقفين علشان احنا بنكون في حضور ملك الملوك اللي ليه سلطان علي الكون كله و لو تعبان استأذن الاول انا بعمل كده و هو عارف اني مبكذبش عليه علشان كده انا و هو علاقتنا مهما انا قصرت فيها بيرجع يبعتلي حاجة يقولي فيها مش كفاية بُعد بقي سواء كان ده بترنيمة او كلمة او رسالة ، هو بيعرف يوصلي كويس.

انا مش عارفة افهمكم قوي معني عمق جديد مع ربنا ، غير انه فعلاً الموضوع سهل جداً محتاج صدق في الوصول و عدم استسلام و ايمان باللي عايز توصله معاه و رغبة حقيقة في معرفة ذات الله و شكر علي كل اللي هيحصلك في التجربة دي و تركيز و هدوء علشان تسمع صوته و هو بيقولك تعمل ايه و تبدأ منين ( اسألوا تعطوا .. اطلبوا تجدوا .. اقرعوا يفتح لكم ) بسيطة يعني.

انا في بداية رحلتي اتقالي صلي بس الكلمتين دول بصدق و هو هيتصرف ( عرفني ذاتك ) و من ٥ سنين و لحد دلوقتي و انا في صلاتي بقوله كده و كل يوم بكتشف حاجة اجمل فيه و صدقوني الايام دي انا احياناً مبعرفش انام من كتر احساسي اني قلبي هيطلع من مكانه من حبي فيه و اني مش عايزه انام و اسيبه فبفضل سهرانه معاه.

ربنا حنين و احنا من جوانا غلبانين قوي .. انسوا العالم و مشاكلكم و طلباتكم هو مش ساحر و ركزوا بس فيه .. و بالمناسبة صوموا بقلبكم و فكركم قبل الاكل و انسوا ملذات العالم و شهواته علشان مش هيفيدونا في حاجة .. و ارجوكم انسوا الطوايف اللي لحد دلوقتي مش فاهمه فكرتها ايه مادام الهدف الاساسي لينا كلنا نوصل لربنا فايه لازمتها تعذبوا نفسكم كده و كل طايفة تفضل تتعالي علي التانية صدقوني انا لما حد بيفضل يقنعني انهم الصح و الكلام ده انا بضحك من جوايا علشان انا اصلا مش هاممني لان مدام ربنا معايا و فاهمين بعض فخلاص كده مش محتاجة كل ده .. انا بحبة جداً و ده كفايه عليا و متأكده انه شايف قلبي و بيحبني اكتر.

ربنا بيحبكم و مستنيكم و متنسوش ( الرب قريب لمن يدعوه ) و بالمناسبة الترنيمة دي كانت بداية معرفتي بأحلي حاجة في حياتي.

ربنا معاكم.
الصديقة سارة

إذا افادك المقال بشجعك فى الاشتراك فى كورس كيف انمو فى حياتى مع المسيح https://talmazaonline.com/courses/growth/